Caiff camerâu diogelwch eu defnyddio i wneud ffyrdd yn fwy diogel ac i arbed bywydau, nid i wneud arian nac i ddal modurwyr ar y slei.
Mae'r camerâu yno i annog pobl i yrru o fewn y terfyn cyflymder ac felly, y camerâu mwyaf llwyddiannus yw'r rhai sy'n cofnodi'r nifer LEIAF o droseddau, nid y mwyaf.
Mae pob camera yn ardal Partneriaeth Lleihau Anafiadau Ffyrdd Cymru yn cydymffurfio â chanllawiau Llywodraeth Cymru (LC) ar y mannau lle caniateir rhoi camerâu. Mae sut a phryd y defnyddir y camerâu yn dibynnu ar y damweiniau a'r problemau diogelwch ffyrdd yn y gwahanol leoliadau.
Cofiwch y caiff swyddogion heddlu ddefnyddio camerâu ar bob heol hefyd ac nad oes raid iddyn nhw gydymffurfio â'r un canllawiau o ran bod yn weladwy.
Felly, bob tro y gwelwch gamera diogelwch, cofiwch mai ei ddiben yw helpu i sicrhau eich bod chi a phobl eraill yn cael siwrne ddiogel, nid dal modurwyr ar y slei a gwneud arian.
Dim ond yn y mannau a ganlyn y cawn ddefnyddio camerâu:
Lle mae pobl wedi cael eu lladd neu eu hanafu
Ceir manylion llawn y meini prawf ynghylch gwrthdrawiadau wrth osod camerâu yng Nghanllawiau'r Cynulliad Cenedlaethol.
Lle ceir man sy'n achos pryder i'r gymuned.
Nid ydym yn credu mewn aros i rywun gael ei anafu cyn gweithredu, felly rydym yn rhoi camerâu symudol mewn mannau lle mae cymunedau wedi cwyno bod cyflymder yn peryglu bywydau a bod arolwg yn cadarnhau bod goryrru yn broblem wirioneddol.