Mae'r pedwar Heddlu yng Nghymru yn ymrwymedig i ddiogelwch ar y ffyrdd ac addysgu gyrwyr. Cyflwynwyd cynllun Ymwybyddiaeth Cyflymder yng ngogledd Cymru ym mis Chwefror 2006 ac yng nghanolbarth a de Cymru ym Mehefin 2009 fel dewis arall i ddirwy a phwyntiau cosb ar y drwydded yrru. Cost y cwrs yw £85, ac fe'i cynigir fel dewis arall i'r ddirwy £60 a 3 phwynt cosb. Mae modurwyr yn gymwys ar yr amod nad ydynt wedi torri'r cyfyngiad cyflymder fwy na 10% + 9mya a heb gwblhau Cwrs Ymwybyddiaeth Cyflymder o fewn tair blynedd. Bydd y rhai sy'n torri'r cyfyngiad cyflymder dros 10% + 9mya yn derbyn cosb benodol neu wynebu proses llys.
Cofrestrir y darparwyr gwasanaethau ar gyfer y cyrsiau gan Gymdeithas Genedlaethol y Darparwyr Cynlluniau Gwella (ANDISP). Mae'r holl hyfforddwyr yn Hyfforddwyr Gyrru Cymeradwy'r Asiantaeth Safonau Gyrru. Ewch i www.dft.gov.uk/DSA i gael rhagor o wybodaeth. Gellir mynd i Gwrs Ymwybyddiaeth Cyflymder mewn unrhyw ardal heddlu lle mae'r Cynllun Cenedlaethol (NDORS) wedi'i fabwysiadu, ni waeth ble digwyddodd y drosedd.
Mae'r cwrs yn weithdy pedair awr mewn ystafell ddosbarth ac fe'i lluniwyd i archwilio'r rhesymau pam mae pobl yn torri'r cyfyngiad cyflymder ac yn ceisio helpu i ddatblygu strategaeth i atal hyn rhag digwydd eto. Ar ddiwedd y cwrs, dylai gyrwyr allu nodi: -
• beth sy'n achosi gyrwyr/beicwyr i yrru'n rhy gyflym
• canlyniadau camddefnyddio cyflymder
• cyfyngiadau cyflymder wrth yrru/beicio
• peryglon posibl ar y ffordd
Nid oes prawf ysgrifenedig ffurfiol, ond disgwylir i yrwyr gael agwedd gadarnhaol. Cynigir cyrsiau yn Gymraeg a Saesneg a darperir ar gyfer anableddau.
Gall hyd at 20 person fynd ar gwrs a rhoddir taflenni perthnasol sy'n ymwneud a diogelwch ffyrdd i bob gyrrwr.
Gellir mynd ar un cwrs yn unig mewn cyfnod o dair blynedd ac nid yw'n orfodol. Bydd darparwr y cwrs yn ysgrifennu at yr ymgeisydd gyda manylion am sut i sicrhau lle ar gwrs. Ar ôl cwblhau cwrs yn llwyddiannus, caiff y ffeil am y digwyddiad hwnnw ei gau ac ni chymerir unrhyw gamau eraill. Hysbysir pob gyrrwr am hyn yn ysgrifenedig gan yr Heddlu perthnasol.
Rhaid i dramgwyddwr gwblhau'r cwrs o fewn 4 mis i ddyddiad y drosedd. Gall methu â gwneud hyn arwain at erlyniad.
Darparwyr y Cwrs:-
Canolbarth a de Cymru
TTC Group
Hadley Park East
Hadley
Telford
Swydd Amwythig
TF1 6QJ
Rhif ffôn: 08452704363
www.ttc-uk.com
Gogledd Cymru
AA DriveTech
Fanum House
Basing View
Basingstoke
RG21 4EA
Rhif ffôn: 08453459623
www.aadrivetech.com
Mae'n amlwg o'r adborth bod gyrwyr yn meddwl bod y cwrs yn hynod fuddiol.
Sylwadau a barn gan bobl sydd wedi bod ar y cwrs:
"Hoffwn ddweud cymaint y gwnes i fwynhau'r cwrs ymwybyddiaeth cyflymder. Dysgais cryn dipyn, ac rwy'n teimlo fy mod i'n yrrwr llawer gwell ar ôl hyn. Roedd yr hyfforddwr yn wych. Rwy'n gobeithio daw'r cwrs hwn yn orfodol i bob gyrrwr oherwydd mae ei angen yn fawr ar ein ffyrdd heddiw."
"Es i ar y cwrs ymwybyddiaeth cyflymder yn ddiweddar. Rwyf am ddweud ei fod yn gwrs arbennig o dda ac mewn gwirionedd, mae wedi gwneud i mi ailfeddwl y ffordd rwy'n gyrru. Roedd hwn gymaint yn fwy buddiol na chael dirwy a phwyntiau. Rwy'n credu byddai'n ddefnyddiol iawn i'r rhai sy'n torri'r cyfyngiad cyflymder o gryn dipyn yn ogystal â'u dirwy a'u pwyntiau, gan ei fod yn rhoi canlyniadau eich gweithredoedd mewn cyd-destun.
"Rwy'n ysgrifennu i ganmol eich ymgyrch diogelwch ffyrdd ac i ddiolch i chi am y cyfle i fynd ar gwrs ymwybyddiaeth cyflymder yn hytrach na chael pwyntiau ar fy nhrwydded. Roedd y cwrs wedi'i gynllunio'n a'i gyflwyno'n dda, roedd yn llawn gwybodaeth ac yn ysgogi'r meddwl.